TITO 2:13 Nagpapatunay daw na Dios si Cristo

Tito 2:13  “Na hintayin yaong mapalad na pagasa at ang pagpapakita ng kaluwalhatian ng ating dakilang Dios at Tagapagligtas na si Jesucristo;”

Diretsahan daw na sinabi dito na Diyos si Cristo, dahil ang banggit ay “DAKILANG DIOS AT TAGAPAGLIGTAS NA SI JESUCRISTO”, kaya daw wala na daw pagtatalunan, si Cristo ay Diyos.  Sa biglang tingin, ay aakalain ng Sinoman na ganun nga ang ibig sabihin ng nasabing talata, dahil sa kanilang pagkaunawa iyong salitang “DAKILANG DIOS” at “TAGAPAGLIGTAS” ay parehong tumutukoy kay Cristo.

Gaya nga ng atin nang nasabi kanina, sa Biblia WALANG KONTRADIKSIYON oSALUNGATAN, kasi nga po ang sumulat kay Tito ay si Apostol Pablo na may sinabing ganito:

1 Corinto 8:6  “NGUNI'T SA GANANG ATIN AY MAY ISANG DIOS LAMANG, ANG AMA, na buhat sa kaniya ang lahat ng mga bagay, at tayo'y sa kaniya; at isa lamang Panginoon, si Jesucristo, na sa pamamagitan niya ang lahat ng mga bagay, at tayo'y sa pamamagitan niya.”

Maliwanag niyang sinabi na may ISANG DIYOS LAMANG, ANG AMA. Samakatuwid, sa paniniwala ni Apostol Pablo ang Diyos ay ang AMA lamang. Kaya lalabas niyan kinontra niya ang sarili niyang sinabi kay Tito, kung ating uunawain iyon gaya ng kanilang pagkaunawa.

Bukod dun sinabi pa ni Pablo ang ganito:

1 Timoteo 2:5  “Sapagka't may isang Dios at may isang Tagapamagitan sa Dios at sa mga tao, ANG TAONG SI CRISTO JESUS,”

Niliwanag ni Apostol Pablo na si Cristo ay TAO.  Kaya dalawa ang katotohanang kokontrahin ng kalalabasan ng kanilang pagkaunawa sa Tito 2:13, Una, mayroon lamang iisang Diyos, na walang iba kundi ang AMA, at si Cristo ay TAONG TAGAPAMAGITAN. Kaya imposible po na ituro ni Apostol Pablo na si Cristo ay Diyos sa Tito 2:13.

Kaya bumalik tayo sa Tito 2:13, ano nga ba ang tunay na kahulugan nito?  Ang ibig bang sabihin ni Apostol Pablo dito ay Diyos si Cristo? Ang mga kataga bang “DAKILANG DIOS” at “TAGAPAGLIGTAS” ay parehong kay Cristo tumutukoy? Hayaan kasi natin na si Apostol Pablo ang magpaliwanag dahil siya po ang nagsasalita sa talata, narito po ang katibayan at ating tunghayan kung kanino tumutukoy iyong sinabi niyang “DAKILANG DIOS”:

Tito 1:4  “Kay Tito na aking tunay na anak ayon sa pananampalataya ng lahat: Biyaya at kapayapaan nawang mula sa Dios Ama at kay Cristo Jesus na Tagapagligtas natin.”

Kitang-kita sa sinabi ni Apostol Pablo na hindi tumutukoy ang salitang “DAKILANG DIYOS” kay Cristo sa Tito 2:3, dahil sa Tito 1:4, ay sinabi niya na ang Diyos Ama ang tinutukoy niya, kaya napakaliwanag na DALAWA ANG TINUTUKOY niya sa Tito 2:13, at hindi parehong tumutukoy kay Cristo ang dalawang salita “DAKILANG DIOS” at “TAGAPAGLIGTAS”:

Tito 2:13  “Na hintayin yaong mapalad na pagasa at ang pagpapakita ng kaluwalhatian ng ating “dakilang Dios” [tumutukoy sa Dios Ama] at “Tagapagligtas” na si Jesucristo;”

Tito 1:4  “Kay Tito na aking tunay na anak ayon sa pananampalataya ng lahat: Biyaya at kapayapaan nawang mula sa Dios Ama at kay Cristo Jesus na Tagapagligtas natin.”

Ang mga sinabi at itinuro ni Apostol Pablo kailanman ay hindi magkakakontrahan. Sila lamang ang nagpapaliwanag ng mali kaya lumilikha ng kontradiksiyon.

JUAN 1:18 Si Cristo ba ay Dios?

Juan 1:18  “Walang taong nakakita kailan man sa Dios; ang bugtong na Anak, na nasa sinapupunan ng Ama, siya ang nagpakilala sa kanya.”

Dito naman sa talatang ito, ganito ang kanilang sinasabi: 

“Kita mo brod ang sabi, WALANG TAONG NAKAKITA KAILANMAN SA DIYOS, si Cristo ang nagpakilala sa kaniya.  Eh maipapakilala ba niya ang Ama kung hindi niya nakita? At kung nakita niya ang Diyos, de hindi siya tao, kaya maliwanag na si Cristo ay Diyos.”

Mayroon po kaming nais ipapansin sa inyo, dito po ba sa talatang ito ay mababasa natin na nakita ni Cristo ang Diyos? Wala po tayong mababasang ganun, hindi po ba?  Maaari din po natin silang hamunin na magpakita ng ibang talata na mababasa natin na nakita ni Cristo ang Diyos, at natitiyak namin na wala silang maipapakita sa inyo. Dahil kahit sa buong Biblia wala tayong mababasa na nakita ni Jesus ang Diyos. Bakit?

Colosas 1:15  “Na siya ang larawan ng DIOS NA DI NAKIKITA, ang panganay ng lahat ng mga nilalang;”

Ang Diyos po ay hindi nakikita, kaya imposible na makita siya kahit ni Cristo. Kasama siya sa mga taong hindi nakakita sa Diyos. Eh ang tanong nga eh, Paano niya naipakilala eh hindi naman pala niya nakita? 

 Juan 12:49  “Sapagka't ako'y hindi nagsasalita na mula sa aking sarili; kundiang Ama na sa akin ay nagsugo, ay siyang nagbigay sa akin ng utos, kung ano ang dapat kong sabihin, at kung ano ang dapat kong salitain.”

Napakalinaw ng sagot ni Jesus, nagsasalita ang Diyos sa kaniya ng mga bagay na dapat niyang salitain, kaya sa ganitong paraan niya naipakilala ang Diyos at hindi dahil sa nakita niya kaya niya naipakilala. Maliwanag na siya’y inutusan ng Diyos na ipakilala siya:

Juan 17:25  “Oh Amang banal, hindi ka nakikilala ng sanglibutan, nguni't nakikilala kita; at nakikilala ng mga ito na ikaw ang nagsugo sa akin;”

Juan 17:26  “At ipinakilala ko sa kanila ang iyong pangalan, at ipakikilala ko; upang ang pagibig na sa akin ay iniibig mo ay mapasa kanila, at ako'y sa kanila.”

Kaya nga nang ipakilala ni Cristo ang Diyos, ang ipinakilala ba niya ay ang kaniyang sarili? Basahin natin:

Juan 17:1  “Ang mga bagay na ito ay sinalita ni Jesus; at sa pagtingala ng kaniyang mga mata sa langit, ay sinabi niya, AMA, dumating na ang oras; luwalhatiin mo ang iyong Anak, upang ikaw ay luwalhatiin ng Anak:”

Juan 17:3  “AT ITO ANG BUHAY NA WALANG HANGGAN, NA IKAW AY MAKILALA NILA NA IISANG DIOS NA TUNAY, at siyang iyong sinugo, sa makatuwid baga'y si Jesucristo.”

Ang Ama ang nag-iisang Tunay na Diyos sabi ng Panginoong Jesus, ganito niya Siya ipinakilala.  Ang pagpapakilala sa tunay na Diyos ay ang pangunahing Misyon ni Cristo sa lupa.

Kaya gaya ng ibang talata, mali na naman sila dito ng pagkaunawa, at hindi kailanman nila magagamit ang mga talatang ito para patunayan na Diyos si Cristo.

JUAN 14:7-9 Ang nakakita sa akin ay nakakita sa Ama

Sa ating pagpapatuloy, ay atin pang tatalakayin ang ilan pa sa mga talata ng Biblia na kanilang ginagamit na nagpapatunay daw na totoo ang kanilang aral na si Cristo ay tunay na Diyos.  Ituloy na natin.

   Narito pa ang isa sa kanilang ginagamit, basahin po natin:

Juan  14:7  “Kung ako'y nangakilala ninyo ay mangakikilala ninyo ang aking Ama: buhat ngayon siya'y inyong mangakikilala, at siya'y inyong nakita.”

Juan 14:8  “Sinabi sa kaniya ni Felipe, Panginoon, ipakita mo sa amin ang Ama, at sukat na ito sa amin.”

Juan 14:9  “Sinabi sa kaniya ni Jesus, Malaon nang panahong ako'y inyong kasama, at hindi mo ako nakikilala, Felipe? ang nakakita sa akin ay nakakita sa Ama; paanong sinasabi mo, Ipakita mo sa amin ang Ama?”

Maliwanag daw na sinabi ni Jesus sa verse na ito na:  “ANG NAKAKITA SA AKIN AY NAKAKITA SA AMA”, at dahil daw sa ang Ama ay Diyos, at ang Nakakita kay Cristo ay nakakita sa Ama, samakatuwid si Cristo ay Diyos.

Kapansin-pansin na kapag sila ay gumagamit ng mga talata, palaging yung salitang “si Cristo ay Diyos” ay hindi mo naman mababasa sa verse na ibinibigay nila.  At kadalasan, ito ay ang kanila lamang pakahulugan, interpretasyon o pagkaunawa sa talata.  Mahilig lang po talagang magbigay ng sarili nilang kahulugan ang mga naniniwalang si Cristo ay Diyos.  Ganito po sila kung gumamit ng Biblia. 

Tama po bang gawin ng isang tao ang pagbibigay ng maling kahulugan sa mga verse sa Biblia? Basahin po natin ang paliwanag ni Apostol Pedro:

2 Pedro 3:16 “Sa lahat ng sulat niya tungkol sa paksang ito, ganito ang lagi niyang paalala.Kaya lang, ang ilang bahagi sa kanyang mga sulat ay mahirap unawain, atBINIBIGYAN NG MALING KAHULUGAN ng mga mangmang at magugulo ang pag-iisip. Ganyan din ang kanilang ginagawa sa ibang mga Kasulatan, kaya nga't ipinapahamak nila ang kanilang sarili.”  [Magandang Balita, Biblia]

Kapahamakan po ang idudulot sa tao ng kapangahasan na kaniyang ginagawa sa Biblia, sa pamamagitan ng pagbibigay ng Maling Kahulugan sa mga talata o verse. Kaya ang ganitong gawain ay dapat iwasan ng sinoman.

Paano natin natitiyak na mali ang kanilang pakahulugan?  Mga kaibigan, sa Biblia po ay walang kontradiksiyon o salungatan.  Kung ating tatanggapin na Diyos si Cristo sa Juan 14:7-9, kokontrahin po niyan ang napakaraming talata sa Biblia. Sinabi po ni Jesus na ang Ama ang nag-iisang Diyos na tunay sa Juan 17:1,3.  Maliwanag na nilinaw ni Jesus sa atin na IISA LAMANG ANG TUNAY NA DIYOS at walang iba kundi ang AMA.  Kaya imposible na lumabas na Diyos si Cristo sa talatang iyan, dahil nabanggit na natin sa nakaraan, si Cristo ay ANAK at hindi siya ang AMA.  At niliwanag ni Cristo na ang AMA ang ating Diyos, gaya ng mababasa saJuan 20:17, basahin natin:

Juan 20:17  “Sinabi sa kaniya ni Jesus, Huwag mo akong hipuin; sapagka't hindi pa ako nakakaakyat sa Ama, nguni't pumaroon ka sa aking mga kapatid, at sabihin mo sa kanila, Aakyat ako sa AKING AMA at INYONG AMA, at AKING DIOS at INYONG DIOS.”

Napakaliwanag na sinabi ni Jesus na ang ating Diyos ay ang kaniyang AMA na dapat ay AMA din natin.  Kung tutuusin, sa mga salita pa lamang na ito, ay dapat wala na tayong pagtatalo, dahil hindi naman sinabi ni Jesus dito na:  “AAKYAT NA ANG INYONG DIYOS” kundi: “AAKYAT AKO SA AKING AMA AT INYONG AMA, AT AKING DIYOS AT INYONG DIYOS”, kaya napakaliwanag na hindi siya ang Diyos kundi ang Ama.

Kaya maliwanag ngayon na hindi maaaring ang maging kahulugan ng Juan 14:7-9 ay Diyos si Cristo.  Ating balikan at unawaain ng tama.  Bakit ba sinabi ni Jesus na: “ANG NAKAKITA SA AKIN AY NAKAKITA SA AMA”, dapat kasi hindi tayo ang nagbibigay ng kahulugan eh, dahil hindi naman tayo ang nagsasalita diyan kundi si Cristo.  Ating tunghayan ang tunay na kahulugan ng talata, si Cristo mismo ang magpapaliwanag sa atin, ituloy lang natin ang pagbasa sa mga kasunod na verse:

Juan 14:9  “Sinabi sa kaniya ni Jesus, Malaon nang panahong ako'y inyong kasama, at hindi mo ako nakikilala, Felipe? ANG NAKAKITA SA AKIN AY NAKAKITA SA AMA; paanong sinasabi mo, Ipakita mo sa amin ang Ama?”

Juan 14:10  “Hindi ka baga nananampalataya na ako'y nasa Ama, at ang Ama ay nasa akin? Ang mga salitang aking sinasabi sa inyo'y hindi ko sinasalita sa aking sarili: kundi ang Ama na tumatahan sa akin ay gumagawa ng kaniyang mga gawa.”

Juan 14:11  “Magsisampalataya kayo sa akin na ako'y nasa Ama, at ang Ama ay nasa akin: o kungdi kaya'y magsisampalataya kayo sa akin dahil sa mga GAWA rin.”

Kadalasan ang mga gumagamit ng talatang ito ay hindi binabasa ang mga kasunod na talata, kasi nga mabubuko sila na mali ang kanilang pagkaunawa dito, maliwanag at napakasimple lamang ng kahulugan nung sinabi ni Jesus na: “ANG NAKAKITA SA AKIN AY NAKAKITA SA AMA” na ang ibig sabihin lamang ay:  “ANG AMA NA TUMATAHAN SA AKIN AY GUMAGAWA NG KANIYANG MGA GAWA”.  Ang mga GAWA ng AMA ang nakikita nating ginagawa ni Cristo, kaya katumbas nun NAKIKITA natin ang AMA sa pamamagitan niya.  Ganun lamang po kasimple iyon.

Sa isang simpleng Halimbawa:  Pag sinabi ba ng Nanay mo:  “NAKIKITA KO ANG TATAY MO SA IYO”, ibig bang sabihin nun, IKAW NA RIN YUNG TATAY MO? De lalabas niyan kung uunawain natin ang pakahulugan nila:  asawa ka rin ng Nanay mo?  Napakahalay ng kalalabasan hindi po ba?  Hindi ba ang ibig sabihin lamang niyan ay:  “MAY TAGLAY KA NG KATANGIAN NG TULAD SA IYONG TATAY” kaya maaaring makita ang Tatay mo sa iyo. Ganun din ang AMA kay Cristo, dahil ang mga ginagawa ni Cristo ay Gawa ng AMA, kaya makikita ang AMA kay Cristo, simpleng kahulugan, ngunit iminali ng mga taong kulang sa kaalaman sa katotohanan.

Kaya kitang-kita na mali na naman sila ng pagkaunawa sa talatang ito…

Gen.1:26, Kawikaan 8:22-30 at Juan 1:3 Si Cristo Dios na manlalalang?

Si Cristo ba’y Diyos na Manlalalang?

“Na siya ang larawan ng Dios na di nakikita, ang panganay ng lahat ng mga nilalang.” (Colosas 1:15)

MALINAW NA ITINUTURO ng Biblia na ang tunay na Diyos na lumikha ng lahat ng bagay ay ang Ama na nasa langit. Gayunpaman ay may mga naniniwala na si Cristo raw ang tunay na Diyos at Siya ring Manlalalang. Sinisikap nilang patunayan ito sa pamamagitan ng paggamit din ng mga talata sa Biblia. Dahil dito, mahalagang suriin natin ang ilan sa mga talatang ito at alamin kung tama ang pagkaunawa nila sa mga ito.

1. Juan 1:3: “Ang lahat ng mga bagay ay ginawa sa pamamagitan niya; at alin man sa lahat ng ginawa ay hindi ginawa kung wala siya.”

Si Cristo raw ang Diyos na Lumalang ng lahat ng bagay dahil sinasabi sa talata na ang lahat ay ginawa sa pamamagitan Niya.

2. Genesis 1:26: “At sinabi ng Dios, Lalangin natin ang tao sa ating larawan, ayon sa ating wangis: at magkaroon sila ng kapangyarihan sa mga isda sa dagat, at sa mga ibon sa himpapawid, at sa mga hayop, at sa buong lupa, at sa bawa’t umuusad, na nagsisiusad sa ibabaw ng lupa.”

Ang talatang ito ay isa pa raw sa mga katibayan na si Cristo ay Siya ring Diyos na Lumalang sapagkat dito raw ay kausap ng Diyos ang dalawa pang persona ng tinatawag nilang Trinidad. Kaya ang ka-“natin” daw dito ng Diyos ay si Cristo at ang Espiritu Santo.

3. Kawikaan 8:22-30: “Inari ako ng Panginoon sa pasimula ng kaniyang lakad, Bago pinasimulan ang kaniyang mga gawa ng una. Ako’y nalagay mula noong araw mula ng walang pasimula, Bago nalikha ang lupa. Ako’y nailabas ng wala pang mga kalaliman; Nang wala pang mga bukal na sagan ng tubig. Bago ang mga bundok ay nalagay, Bago ang mga burol ay ako’y nailabas: Samantalang hindi pa niya nililikha ang lupa, ni ang mga parang man, Ni ang pasimula man ng alabok ng sanglibutan. Nang kaniyang itatag ang langit nandoon ako: Nang siya’y maglagay ng balantok sa balat ng kalaliman: Nang kaniyang pagtibayin ang langit sa itaas: Nang maging matibay ang mga bukal ng kalaliman: Nang bigyan niya ang dagat ng kaniyang hangganan, Upang huwag salangsangin ng tubig ang kaniyang utos: Nang kaniyang iayos ang mga patibayan ng lupa: Nasa siping nga niya ako na gaya ng matalinong manggagawa: At ako ang kaniyang ligaya sa araw-araw, Na nagagalak na lagi sa harap niya.”

Ito ay iniuugnay nila sa mga talatang nasa unahan upang patunayan na si
Cristo ay eksistido na raw bago pa lalangin ang lahat ng bagay. Ang binabanggit daw dito ay si Cristo. Malinaw raw na sinasabi rito na nasa siping na Siya ng Diyos bago pa pinasimulan ang Kaniyang mga gawa at bago nilikha ang lupa. Mula sa mga talatang nabanggit ay nagkonklusyon sila na si Cristo ay Diyos na Manlalalang.

Ang tinutukoy sa Kawikaan 8:22-30 Hindi ang Panginoong Jesucristo ang tinutukoy na naroon na sa pasimula ng paglalang ng Diyos kundi ang karunungan:

“Hindi ba umiiyak ang karunungan, At inilalabas ng unawa ang kaniyang tinig? … Akong karunungan ay tumatahan sa kabaitan, At aking nasusumpungan ang kaalaman at gunita.” (Kaw. 8:1, 12)

Ang karunungang naroon na nang wala pa ang lahat ay ang karunungan o kaunawaan ng Diyos na Kaniyang ginamit sa paglikha sa langit at lupa:

“Nilikha ng Panginoon ang lupa sa pamamagitan ng karunungan; Itinatag niya ang langit sa pamamagitan ng kaunawaan.” (Kaw. 3:19)

Natitiyak natin na ang karunungang ginamit ng Diyos sa paglikha ng langit at lupa ay hindi isa pang Diyos sapagkat kung magkagayon ay darami ang Diyos. Lalabag ito sa doktrina ng Biblia na iisa lamang ang Diyos (Mal. 2:10). Siya ang may-ari ng karunungang ginamit sa paglalang.

Ang ka-“natin” sa Genesis 1:26 Ang ka-“natin” at mga kausap ng Diyos nang sabihin Niyang “lalangin natin ang tao” ay hindi ang inaakala ng iba na dalawa pang persona ng Trinidad, kundi ang mga kerubin at mga serapin na naroon na bago pa nilalang ang tao:

“Ano pa’t itinaboy ang lalake; at inilagay sa silanganan ng halaman ng Eden ang mga Querubin at ang isang nagniningas na tabak na umiikot, upang ingatan ang daang patungo sa kahoy ng buhay.” (Gen. 3:24)

“Sa itaas niya ay nangatayo ang mga serapin: bawa’t isa’y may anim na pakpak: na may dalawa na nagsisitakip ng kaniyang mukha, at may dalawa na nagsisitakip ng kaniyang mga paa, at may dalawa na naglilipad sa kaniya.” (Isa. 6:2)

Subalit nang isagawa na ng Diyos ang aktuwal na paglalang ay Siya lamang mag-isa ang gumawa nito:

“At nilalang ng Dios ang tao ayon sa kaniyang sariling larawan, ayon sa larawan ng Dios siya nilalang; nilalang niya sila na lalake at babae.” (Gen. 1:27)

Walang “ka-manlalalang” o kinatulong ang Diyos nang lalangin Niya ang lahat ng bagay:

“Ganito ang sabi ng Panginoon, ng iyong Manunubos, at niyang naganyo sa iyo mula sa bahay-bata, Ako ang Panginoon na gumagawa ng lahat na bagay; na naglaladlad, na magisa ng langit; na naglalatag ng lupa.” (Isa. 44:24_

“Ikaw ang Panginoon, ikaw lamang; ikaw ang lumikha ng langit, ng langit ng mga langit, pati ng lahat na natatanaw roon, ng lupa at ng lahat na bagay na nangaroon, ng mga dagat at ng lahat na nangaroon, at iyong pinamalaging lahat; at ang hukbo ng langit ay sumasamba sa iyo.” (Neh. 9:6)

Samakatuwid, maling ipakahulugan na sa Genesis 1:26 ay nag-uusap ang mga diumano’y persona ng Trinidad. Ang pinatutunayan ng Biblia na kausap dito ng Diyos ay ang mga kerubin at mga serapin. Ang tunay na Diyos ay walang ka persona na tinatawag na  Trinidad at hindi rin maaari na si Cristo ay maging Diyos na Manlalalang.

Ang kahulugan ng nasa Juan 1:3
Ang sinasabing “ang lahat ay ginawa sa pamamagitan Niya” ay hindi nangangahulugang si Cristo ay ang lumalang, kundi, ang kahulugan nito ay ipamamagitan ni Cristo ang lahat ng bagay:

“Sapagka’t marapat sa kaniya na pinagukulan ng lahat ng mga bagay, at sa pamamagitan niya ang lahat ng mga bagay, …” (Heb. 2:10)

Pinatunayan pa ni Apostol Pablo sa ibang pagkakataon na talagang ang lahat ng bagay na nilalang ay iniukol kay Cristo at sa pamamagitan Niya:

“Sapagka’t sa kaniya nilalang ang lahat na mga bagay, sa sangkalangitan at sa sangkalupaan, na mga bagay na nakikita at ang mga bagay na di nakikita, maging mga luklukan o mga pagsakop o mga pamunuan o mga kapangyarihan; lahat ng mga bagay ay nilalang sa pamamagitan niya at ukol sa kaniya.” (Col. 1:16)

Kailangan ng lahat ng taong nilalang ng Diyos na sila’y ipamagitan ni Cristo sapagkat sa pamamagitan Niya ay papagkakasunduin ang tao sa Diyos:

“At sa pamamagitan niya ay pakipagkasunduin sa kaniya ang lahat ng mga bagay, na pinapayapa niya sa pamamagitan ng dugo ng kaniyang krus; sa pamamagitan niya, sinasabi ko, maging mga bagay sa kalupaan, o mga bagay sa sangkalangitan. At kayo, nang nakaraang panahon ay nangahihiwalay at mga kaaway sa inyong pagiisip sa inyong mga gawang masasama. Gayon ma’y pinakipagkasundo niya ngayon sa katawan ng kaniyang laman, sa pamamagitan ng kamatayan, upang kayo’y iharap na mga banal at walang dungis at walang kapintasan sa harapan niya.” (Col. 1:20-22)

Kaya, kung sinabi man sa Juan 1:3 na “ang lahat ng bagay ay ginawa (o nilalang) sa pamamagitan Niya” (o ni Cristo), hindi ito nangangahulugang si Cristo ay Diyos na Manlalalang. Ipinakikilala lamang nito na si Jesus ay Tagapamagitan ng tao sa Diyos (I Tim. 2:5).

Si Cristo’y hindi Diyos na Manlalalang
Ang isa pang katibayan na si Cristo’y hindi Diyos na Manlalalang ay ang katotohanang Siya man ay nilalang din ng Diyos:

“Na siya ang larawan ng Dios na di nakikita, ang panganay ng lahat ng mga nilalang.” (Col. 1:15)

Isa pa ito sa lalong nagpapatunay na mali ang pagkaunawa ng mga naniniwalang si Cristo’y Diyos sa mga talatang ginamit sa Juan 1:3; Genesis 1:26, at Kawikaan 8:22-30. Si Cristo ay hindi manlalalang, kundi isa Siyang nilalang. Siya ang panganay sa lahat ng nilalang.

Bakit sinabing si Cristo ang panganay sa lahat ng nilalang gayong hindi naman Siya ang unang taong nilalang? Sapagkat nakilala na Siya nang una bago pa itinatag ang sanlibutan. Siya ang una sa pagkapanukala. Nasa isip na Siya ng Diyos bago pa lalangin ang sanlibutan. Ngunit wala pang Cristo sa kalagayan noong pasimula ng paglalang. Inihayag lamang Siya nitong mga huling panahon:

“Na nakilala nga nang una bago itinatag ang sanglibutan, nguni’t inihayag sa mga huling panahon dahil sa inyo.” (I Ped. 1:20)

Nahayag o nagkaroon ng katuparan ang nasa isip ng Diyos noong una ukol sa pagkakaroon ng Cristo nang Siya ay ipanganak ng isang babae, si Maria na Kaniyang ina:

“Datapuwa’t nang dumating ang kapanahunan, ay sinugo ng Dios ang kaniyang Anak, na ipinanganak ng isang babae, na ipinanganak sa ilalim ng kautusan.” (Gal. 4:4)

Paano ngayon sasabihing si Cristo ang Siyang Diyos na Manlalalang? Si Cristo mismo ay hindi papayag sa gayong aral. Manapa, ipinakilala ni Cristo kung sino lamang ang Diyos na dapat sampalatayanan upang makamit ng tao ang buhay na walang hanggan – ang Ama at hindi ang Anak ang iisang tunay na Diyos:

“Ang mga bagay na ito ay sinalita ni Jesus; at sa pagtingala ng kaniyang mga mata sa langit, ay sinabi niya, Ama, dumating na ang oras; luwalhatiin mo ang iyong Anak, upang ikaw ay luwalhatiin ng Anak: … At ito ang buhay na walang hanggan, na ikaw ay makilala nila na iisang Dios na tunay, at siyang iyong sinugo, sa makatuwid baga’y si Jesucristo.” (Juan 17:1, 3)

Hindi ipinakilala ni Cristo ang Kaniyang sarili na Diyos, kundi “Anak” at “sinugo” ng Ama na Siyang iisang Diyos na tunay.

Samakatuwid, nagkakamali sa pagkaunawa at paggamit ng mga talata ng Banal na Kasulatan ang mga nagtuturo at naniniwalang si Cristo ay Diyos. Ang iisang tunay na Diyos ay ang Ama na lumalang ng lahat ng bagay. Hindi si Cristo ang Diyos na lumalang. Si Cristo ay nilalang. At bagama’t Siya ay pinagkalooban ng Ama ng maraming katangian at karangalang wala sa ibang tao, Siya ay tao sa likas na kalagayan. Ito ay isa sa mga aral na dapat panindiganan at sampalatayanan sapagkat ito ay ikapagkakaroon ng buhay na walang haggan.

Ang Likas na Kalagayan ni Cristo Ang mga kamaliang ibinunga ng aral na si Cristo ay Diyos (Huling Bahagi)

SA MGA NAKARAANG pagtalakay tungkol sa likas na kalagayan ni Cristo, ay napatunayan na ang aral na si Cristo ay Diyos ay nabuo lamang sa Konsilyo ng Nicea noong 325 A.D. Walang kinalaman si Cristo at ang mga apostol sa pagkakabuo ng aral na ito sapagkat noon ay matagal nang nasa langit si Cristo at matagal na ring patay ang Kaniyang mga apostol. Natiyak din natin na ang orihinal na aral na tinanggap ng mga unang Cristiano ay tao si Cristo. Walang pahayag ang Biblia na si Cristo ay tunay na Diyos. Ang mga katotohanang ito ay sinasalungat ng aral na si Cristo ay Diyos na isang maling aral at katha lamang ng tao.

Ipakikita sa artikulong ito na ang maling aral na si Cristo ay Diyos ay nagbunga ng iba pang mga maling doktrina.

‘Ina ng Diyos’

Ang isa sa mga maling paniniwala o pagkakilala na ibinunga ng pagtuturong si Cristo ay tunay na Diyos ay ang aral na si Maria ay “Ina ng Diyos.” Bakit nagkaroon ng paniniwala na si Maria ay ina ng Diyos? Ganito ang pahayag ng isang aklat-Katoliko:

“77. Bakit ang Banal na Birhen Maria ay Ina ng Diyos?
“Ang Banal na Birhen Maria ay Ina ng Diyos, sapagkat si Jesus, na kaniyang
Anak, ay Diyos.” )The Creed, p. 111)¹
Kaya raw naging ina ng Diyos si Maria ay sapagkat si Cristo na kaniyang anak ay Diyos. Ang doktrinang si Maria ay ina ng Diyos ay walang saligan sa Biblia. Sa pagtuturo ng Biblia, si Maria ay tinatawag na “ina ni Jesus” (Gawa 1:14) at “ina ng Panginoon” (Lucas 1:43), ngunit walang mababasa na siya ay tinawag na “Ina ng Diyos.” Ito’y pinatutunayan maging ng isang tagapagturong Katoliko, si Juniper B. Carol, O.F.M.:

“Walang matatagpuan sa Biblia na ginamit ang ekspresyong ‘Ina ng Diyos’. Binabanggit nito si Maria bilang ‘ina ni Jesus’ at ‘ina ng Panginoon’.” (Fundamentals of Mariology, p. 37)²

Ang doktrina ng Iglesia Katolika na si Maria ay ina ng Diyos ay nabuo lamang sa Konsilyo ng Efeso noong 431 A.D., daan-daang taon na ang nakalipas matapos isulat ang Biblia:

“3. Pangkalahatang Concillo ng Efeso, 431
“Upang mapabulaanan ang erehiyang kristolohikal ni Nestorius, ipinahayag na muli ng consiliong ito ang doktrina sa tunay na pagkatao ni Kristo, at ipinangaral na tunay na Theotokos, Ina ng Diyos, ang Kaniyang ina, ang Banal na Birhen Maria, sa pamamagitan ng pagkakatawang-tao.” (Ang Aral ni Kristo: Isang Katesismong Katoliko, p. 647)³

Bunga ng doktrinang si Cristo ay tunay na Diyos ay bumangon ang isang maling doktrina sa Konsilyo ng Efeso noong 431 A.D – ang aral na si Maria ay tunay na ina ng Diyos. Bakit nating natitiyak na ito’y maling aral? Sapagkat sa pagsasabing si Maria ay ina ng Diyos, lumilitaw na ang Diyos ay anak ng tao sapagkat si Maria ay isang tao. Ito ay isang pagsalungat sa itinuturo ng Biblia na: “Ang Dios ay hindi tao na magsisinungaling, Ni anak ng tao na magsisisi…” (Blg. 23:19).

Pagkakatawang-Tao (Inkarnasyon)

Ano pa ang kamaliang ibinunga ng pagtuturong si Cristo ay tunay na Diyos? Tunghayan natin ang pahayag ng paring Jesuita na si John Walsh sa kaniyang aklat na This is Catholicism:

“T[anong] 5 Paano naging tao ang Anak ng Diyos?
“Itinuturo ng Iglesia [Katolika] na Siya ay naging tao sa paraang tinaglay niya sa Kaniyang sarili ang kalikasang tao na gaya ng sa atin. Ang pangyayaring ito ay kinikilala bilang Inkarnasyon (Pagkakatawang-tao), na mula sa salitang Latin, na ang literal na kahulugan ay pagpasok sa katawang-laman.” (p. 187)⁴

Sa aral na ito ng Iglesia Katolika ay sinasabing si Cristo ay umiiral na bilang Diyos bago pa isinilang ni Maria. Ang pagsisilang ni Maria kay Jesus ay ang pagkakatawang-tao raw ng Diyos. Ano ang kamalian ng doktrinang ito ng pagkakatawang-tao o Inkarnasyon? Ganito ang patuloy na pagpapaliwanag ng paring Jesuita:

“T. 8 Nang ang Anak ay maging tao tumigil na ba Siya sa pagiging Diyos?
“Ang Diyos ay hindi kailanman tumitigil sa pagiging Diyos. Sa pagtataglay ng kalikasang tao, kung gayon, ang Anak ay nagpasimulang maging tao habang nagpapatuloy sa pagiging Diyos; Siya ay naging tao bukod pa sa pananatiling Diyos.

“T. 9 Kung gayon, mayroon bang dalawang kalikasan si Jesus?
“Si Cristo ay nagtataglay ng dalawang kalikasan: kalikasang Diyos at kalikasang tao.Siya ay Diyos at tao.” (Ibid., p 188)⁵

Sinabi ng paring Jesuita na si John Walsh na nang magkatawang-tao ang Diyos bilang si Cristo, hindi nawala ang Kaniyang pagka-Diyos. Kaya, si Cristo raw ay nagtataglay ng dalawang kalikasan – ang kalikasang Diyos at ang kalikasang tao. Dahil dito itinuturo ng Iglesia Katoliko na si Cristo ay tunay na Diyos at tunay na tao.

Mayroon daw bang banggit sa Biblia tungkol sa doktrina ng pagkakatawang-tao o inkarnasyon ng Diyos? Tunghayan natin ang isinasaad ng The HarperCollins Bible Dictionary:

“Inkarnasyon … isang termino na nangangahulugang ‘pumasok sa o maging laman’. Ito ay tumutukoy sa doktrina Cristiana na ang pre-eksistidong Anak ng Diyos ay naging tao kay Jesus. Ang terminong ito ay wala sa Bagong Tipan, …” (p. 452)⁶

Maliwanag na wala sa Bagong Tipan ang terminong ‘inkarnasyon’. Ito ay inimbento lamang ni Ireneo:

“… Pinagtumbas ni San Ireneo ang mga terminong laman at tao sa pinakaunang pagsisikap na ipaliwanag ang misteryo ng Inkarnasyon sa isang malinaw na pormula. Sa kaniyang akda na Against the Heresies(Book 3, ch. Xvii, no. 7) sinabi niya na ang pormulang ‘Ang Verbo ay naging laman’ ay nangangahulugang ‘Ang Verbo ay naging tao’. …Sa Kabanata 19, inimbento niya ang ating salitang teknikal na Inkarnasyon, σαρκωσις, yayamang ito ang unang pagkakataong ginamit ang terminong ito.” (What is the Incarnation?, p. 26)⁷

‘Dalawang Kalikasan sa isang Persona’

Kailan naman nabuo ang doktrinang si Cristo ay nagtataglay ng dalawang kalikasan? Ganito ang paliwanag ng Iglesia Katolika:

“4. Pangkalahatang Concilio ng Chalcedon, 451
“Itinuturo ng conciliong ito na bagaman Diyos at tao si Hesukristo, nananatili pa rin Siya na isang Persona, na ang ibig sabihin, isang personang may dalawang kalikasan, isang makalangit at makalupa.” (Ang Aral ni Kristo: Isang Katesismong Katoliko, p. 647)

Inamin ng paring Katoliko na si Bertrand L. Conway na ang aral tungkol sa dalawang kalikasang nagsama sa isang persona ay hindi mababasa sa Biblia: “Totoo na ang Biblia ay hindi naglalaman ng eksaktong pormulang panteolohiya ng ‘dalawang Kalikasan sa isang Persona’ …” (The Miniature Question Box, p. 47).⁸

Ang pagkakatawang-tao (Inkarnasyon) at ang doktrina ng Igesia Katolika na ang dalawang kalikasan ay nagsama sa isang persona nang maganap ang diumano’y pagkakatawang-tao ay maling aral at salungat sa itinuturo ng Biblia. Ang Diyos ay hindi nagbago ni may anino man ng pag-iiba (Mal. 3:6; Sant. 1:17). Ipinahayag din ng Diyos, “ako’y Dios, at hindi tao” (Ose. 11:9) at sa Ezekiel 28:2 ay sinasabing ang tao ay hindi Diyos.

Ang aral na si Cristo ay tunay na Diyos at tunay na tao ay aral lamang ng tao (man-made dogma) na inimbento ni Origen, isa sa mga kinikilalang Church Fathers ng Iglesia Katolika:

“Ang pangunahing awtoridad sa Alejandria nang mga unang araw na yaon ay si Origen na, sa pagtuturo tungkol kay Jesucristo, ay inimbento ang terminong ‘Diyos na tao’ o ‘taong Diyos’.” (Church History in Plain Language, p. 124)⁹

Namatay raw ang Diyos

Ano pa ang kamaliang ibinunga ng patuturong si Cristo ay tunay na Diyos? Ganito ang sinasabi ng isang aklat-Katoliko: “Namatay at nagpakasakit Siya sa Kanyang kalikasang tao, at Siya ay Diyos, kaya’t masasabi rin natin na nagpakasakit at namatay ang Diyos” (Ang Aral ni Kristo: Isang Katesismong Katoliko, p. 88).

Ayon sa aral-Katoliko, dahil si Cristo raw ay Diyos, nang mamatay si Cristo ay namatay daw ang Diyos. Ito ay hindi lamang isang malaking kamalian kundi isang malaking kalapastanganan sapagkat ang tunay na Diyos ay walang kamatayan: “Ngayon sa Haring walang hanggan, walang kamatayan, di nakikita sa iisang Dios, ay ang kapurihan at kaluwalhatian magpakailan kalian man. Siya nawa” (I Tim. 1:17).

Si Cristo ang namatay at hindi ang Diyos. Ito ay pinatutunayan ng Biblia at ng kasaysayan. Ang kamatayan ni Cristo ay isang katunayang hindi Siya ang tunay na Diyos sapagkat ang tunay na Diyos ay hindi kailanman namamatay.

Kaya, dapat paniwalaan ng tao ang mga ipinahayag sa Biblia tungkol sa likas na kalagayan ng ating Panginoong Jesucristo upang hindi siya mahulog sa maraming iba pang kamalian na ibinunga ng maling pagtuturo na si Cristo ay tunay na Diyos.

Sanggunian
¹ “77. Why is the Blessed Virgin Mary the Mother of God?
“The Blessed Virgin Mary is the Mother of God because Jesus, her Son, is God.” (Grau, Ma. Veritas, D.S.P. The Creed. Nihil Obstat: Rt. Rev. Msgr. Victor R. Serrano, H.P., Censor. Imprimatur:Rt. Rev. Msgr. Benjamin L. Marino, P.A., Vicar Genera & Chancelor. Pasay, Metro Manila: Saint Paul Publications, n.d.)

² “The Bible nowhere uses the expression ‘Mother of God’. It refers to Mary as ‘the mother of Jesus’ and ‘the mother of the Lord’.” (Carol, Juniper B., O.F.M. Fundamentals of Mariology. Imprimi Potest: Celsus Wheeler, O.F.M., Provincial. Nihil Obstat: John A. Goodwine, J.C.D., Censor Librorum. Imprimatur: Francis Cardinal Spellman, Archbishop of New York. New York: Benziger Brothers, Inc., 1956.)

³ Ang Aral ni Kristo – Isang Katesismong Katoliko. Salin sa Pilipino ni Bayani Valenzuela, SVD – Mula sa “The Teaching of Christ – A Catholic Catechism for Adults.” Nihil Obstat: Reberendo Laurence Gollner, Censor Librorum. Imprimatur: Leo A. Pursley, D.D., Obispo ng Fort Wayne-South Bend. Quezon City, Philippines: JMC Press, Inc., 1978.

⁴ “Q. 5 How did the Son of God become man?
“The Church teaches that He became man by taking to Himself a human nature like ours. This event is known as the Incarnation, a word of Latin derivation, which means literally entering-into-fesh.” (Walsh, John., S.J. This is Catholicism. Imprimi Potest: James E. Coleran, S.J., Provincial, New England Province. Nihil Obstat: Alfred R. Julien, J.C.D., Diocesan Censor. Imprimatur: Richard Cardinal Cushing, Archbishop of Boston. New York, USA: Image Books, 1959.)

⁵ “Q. 8 When the Son became man did He then cease to be God?
“God can never cease to be God. In assuming our human nature, therefore, the Son began to be man while continuing to be God; He became man in addition to remaining God.

“Q. 9 Does Jesus Christ, then, have two natures?
“Christ possesses two natures: divine nature and human nature. He is both God and man.” (Ibid.)

⁶ “Incarnation … a term meaning ‘to enter into or become flesh’. It refers to the Christian doctrine that the pre-existent Son of God became man in Jesus. The term does not appear in the NT, …” (Achtemeier, Pau J., Gen. Ed. The HarperCollins Bible Dictionary. New York, USA: HarperCollins Publishers, 1985, 1996.)

⁷ “… St Irenaeus identified the terms flesh and man in the earliest effort to express the mystery of the Incarnation in clear formula … In his Against the Heresies (Book 3, ch. xviii, no. 7) he stated that the formula ‘The Word was made flesh’ means that ‘The Word was made man’ … In chapter xix he coins our technical word Incarnation, σαρκωσις, this being the first time that the term was used.” (Ferrier, Francis, What is the Incarnation? Translated from the French by Edward Sillem. Nihil Obstat: Daniel Duivestejin, S.T.D., Censor Deputatus. Imprimatur: E. Morrogh Bernard, Vicarius Generais, Westmonasterii. New York: Hawthorn Books, Inc., 1962.)

⁸ “It is true that the Bible does not contain the precise theological formula of ‘two Natures in one Person’ …” (Conway, Bertrand L. The Miniature Question Box. Nihil Obstat: John A. Goodwine, J.C.D., Censor Librorum, Imprimatur: Francis Cardinal Spellman, Archbishop of New York. New York: Paulist Press, 1962.)

⁹ “The early leading voice at Alexandria was Origen, who, in speaking of Jesus Christ, coined the term ‘God-man’.” (Shelley, Bruce L. Church History in Plain Language. Dallas, Texas, USA: Word Publishing, 1982.)

Published in God's Message (Pasugo) Dec 2007